JJ撐恩人正直 劉俐冇聯絡
金牌監製錢國偉（Wilson）被廉署拘捕，與他關係千絲萬縷的「錢女郎」對事件均表關注，當中曾與Wilson傳緋聞的「美少女廚神」賈曉晨直稱對方「大恩人」，對其被捕一事表現擔心。相反「美味天使」劉俐聞言即雞飛狗走，Wilson一日間嘗盡人情冷暖！！
Wilson在06年監製《美女廚房》，除創出42點高收視神話外，還一手捧紅當年的「美少女廚神」冠軍賈曉晨（JJ）。昨日Wilson被廉署拘捕，JJ在電話中表現擔心，愕然地說：「咩話！咁大件事？Wilson係我恩人，如果唔係佢，都唔知幾時先有人識我！」
JJ曾傳出被Wilson追求，但她就大呼冤枉，又維護對方說：「好多人覺得佢成日溝女，又話博人懵，但對我完全冇，反而覺得佢份人好nice，每次傾偈都會好畀心機教我嘢，叫我發音正確啲。（係咪追過你？）哈，完全冇，太搞笑，因為佢係地位好高嘅監製，當年我只係參賽者之一。（有冇一齊食飯？）我成日都想請佢食飯，但太驚傳緋聞，私底下連一次單獨見面都冇，我都覺得唔好意思。」JJ坦言現階段不方便談論案情，但希望事件能盡快解決，又表示：「我會傳短訊畀佢（Wilson），希望快啲冇事。」
除《美女廚房》，Wilson有份製作的《味分高下》和《耳分高下》亦成為不少o靚模入行的捷徑，《美女廚房》中的「美味天使」陳蕊蕊（柑桔）更傳出簽約給陳志雲助手Edthancy所開辦的模特兒公司。
柑桔唔怕涉案
不過柑桔否認傳聞：「我同Edthancy係識咗好耐嘅朋友，都幾熟，08年曾經諗過簽佢，但當時同自己間模特兒公司未完約，最後告吹。（擔唔擔心自己會涉案？）唔驚，我完全冇做犯法嘅事。（擔唔擔心Wilson？）我諗佢都係協助調查啫，佢除咗TVB工作之外，出面嘅嘢都好少掂，覺得佢唔係呢啲人。」
至於另一位「美味天使」劉俐（藍莓）昨午返回將軍澳電視城工作，被追問有沒有與Wilson聯絡？她即煞有介事說：「冇呀，唔知佢係其中一個，我趕住上去傾嘢。」說罷便匆匆離開。
文：專案組