黎耀祥嘆風雨多盼天青
「柴九」黎耀祥及官恩娜昨日出席百佳超市活動，首次擔任超市代言人的祥仔，笑言是次酬勞是開心價。對於陳志雲被廉署拘捕，祥仔稱：「公司冇特別通知我哋，我都係睇新聞至知。上次見佢已經係過年前嘅新書發佈會，當時佢冇咩異樣。（會唔會打畀對方？）唔會喇，等佢靜吓，都擔心，因為佢係個有才華嘅人。呢排咁多風風雨雨，大家畀啲時間等雨過天青啦。」
至於鄧萃雯接受電話訪問時表示：「我比較擔心啲人，因為佢哋都係我同事、朋友。（影響軍心？）應該唔會，公司喺製作方面上晒軌道，公司實唔會有事，因為有咁多年經驗，總之希望啲人冇事啦！」陳奕迅則謂：「識咗陳志雲好耐，希望佢冇事，我冇SMS畀佢，相信佢電話都唔通。（錢國偉呢？）今日（昨日）都冇睇到報紙，都係識咗佢好耐，希望佢冇事啦。我演唱會嘅紀念品冇同陳志雲間製作公司合作，演唱會監製亦唔係錢國偉。」