袁彌明寸TVB用人不善

無綫高層被廉署拘捕，消息轟動全港。雖然無綫上下非常關心事件，但據知無綫對員工已暗下封嘴令，令幕後工作人員及藝員都不公開討論，對外不作回應。

多層出事 連鎖關係

曾與無綫因簽約鬧不和的袁彌明，昨日得悉無綫有高層被拘捕後，有意無意間暗寸無綫及陳志雲。她說：：「ICAC拉人唔會冇證冇據，如果用拘捕嘅字眼，就應該有充分證據，總之有做過嘅人就有做，冇做嘅人就冇做。（覺得陳志雲為人點？）我唔知呀！有啲人面面俱圓，我冇話係邊個呀！（TVB今年好似好多事喎！）無綫用人不善，我冇講係邊個呀，咁多層都出事，係連鎖關係！（使唔使拜神祈福？）其身不正，拜乜神都冇用啦！」

陳志雲另一「仇人」王賢誌，他坦言自己沒有與陳志雲聯絡，只擔心平時有飯聚的高層何麗全，慶幸對方沒牽涉在內。對於陳志雲被拘捕，王賢誌謂：「佢之前做過官，又做過唔同部門高層，對呢啲事應該比較敏感，做事應該好小心。不過今次ICAC調查得，肯定有問題，我會覺得有啲奇怪。」

空穴來風 未必無因

王賢誌又表示沒與陳志雲聯絡，對上一次見他是汪明荃叫他看舞台版《志雲飯局》，王賢誌說：「我嗰次打畀陳志雲買飛，佢叫我打畀Amigo（崔建邦）。（你同Amigo唔啱喎！）啲人話啫，我哋冇嘢，仲同佢入後台同陳志雲say hi。身為觀眾，我好欣賞陳志雲主持上工作。（覺得為人如何？）我唔熟佢為人，唔知。（有冇八卦過今次乜嘢事？）都有，聽講佢同助手一齊開公司，用佢屋企地址登記。（佢開公司賺錢會唔會有衝突？）冇人話打份工唔可以有自己生意，但要睇吓有冇牴觸，之前話佢離開無綫，空穴來風，未必無因囉！」此外，有報道指有人邀他返無綫工作，他不諱言：「唔係高層搵我，係一個幕後搵我，我都同有線傾緊世界盃嘅嘢，依家只可以話唔會簽任何電視台，自己又有生意。」

阿佘搖頭 志偉閃避

另外，身為包薪藝員的佘詩曼相信收到封口指令，昨午她與友人於中環歎茶，提到陳志雲被拘捕，她只笑着搖頭。問到擔不擔心？她亦只搖頭沒有回應。而曾志偉昨傍晚時分現身電視城，離遠見到大批記者，即三百六十度轉身欲避開傳媒，並叮囑司機轉到停車場等候。當他得知停車場亦有大批記者，才放慢腳步說：「我啱啱落機，乜都唔知。（有冇搵過錢國偉？）我都未知咩事，要了解吓。（有冇向樂易玲了解？）未問，個個都開緊會。（點睇呢件事？）我諗唔會啩。（唔會啩係咩意思？）唔會有呢個問題。」

佘詩曼不肯就陳志雲被捕作出回應，只微笑搖頭。

曾志偉本想避開記者，但最終失敗。

文：影視組