賭王千金何超雲早前被本報拍到與Andy密會，男方更為她細心撥髮，當時女方仍未承認拍拖。直到大前晚，超雲被本報拍到在Andy家中迎接21歲生日，關係昭然若揭。結果拍拖遭斷正的超雲，趁前日21歲生日，索性帶同Andy出席生日飯局及派對，二人十指緊扣，大方公開拖友關係，及正式將男友介紹給母親陳婉珍認識。

四月飛英國讀書

前晚超雲先在珍寶王國筵開五席與親友食晚飯慶祝，於七時四十分，身穿黑色連卡佛裙的超雲與Andy乘同一座駕抵達，問二人齊到場，是否承認拍拖？她坦然說：「係呀！費事大家再追住我。（拍咗幾耐？）一排。」至於Andy以甚麼攻勢奪其芳心？超雲尷尬說：「唔係，OK啦！」之前她揚言揀男友要有六呎高，問Andy是否合標準？她忍不住甜笑說：「仲有其他優點，例如對我好。（對你屋企人呢？）OK。（有冇帶佢見爹哋？）冇，醫院只係屋企人去探。（生日願望？）爹哋快啲出院同蜜運成功。」

不過，超雲坦言不會為男友而長留香港，九月將正式入讀英國St. Martins的她，會在四月先到當地上短期課程，惟有以電話跟男友談情。至於Andy被要求向壽星女說生日快樂時，他直言：「尋晚已經同佢講咗。」之後超雲先手翹男友，再十指緊扣上船，表現甜蜜。

晚宴上，超雲與Andy、胞妹超蓮與男友Jeremy及母親陳婉珍齊齊坐在主家席，五人又上台切蛋糕及祝酒，十足「一家人」。晚飯期間，超雲與Andy拖實上廁所，先出來的Andy站在門外等候女友，之後二人再手拖手回會場，儼如孖公仔。

兩人上廁所後拖住回飯廳，甜到漏！

超雲換衫出席派對時與Andy「一拖再拖」。

換戰衣再赴派對

約十時許，五人離場齊齊回家，大前晚到訪Andy家的超雲，今次換作Andy拜訪超雲家，似乎坐穩「未來女婿」地位！超雲更換戰衣後，於十一時許與Andy到達Tazmania Ballroom舉行生日派對繼續狂歡。直至凌晨一時五十分，超雲與Andy拖住登上超雲的座駕離開。

至於超蓮前晚亦拖實男友Jeremy出席晚宴及派對，問到送了甚麼給家姐時，她說：「我同Jeremy一齊送頸鏈，條鏈得一條，唔係大牌子，所以唔會同人撞款。（超雲拍拖？）佢好神秘架！」

禮物逐格睇	何家出品 何家自備兩個蛋糕，最底兩層更是由多個cup cake砌成。	公主蛋糕 有線送上巨型芭比蛋糕，襯晒超雲何家公主的身份！
人人掛住我 出席生日派對的賓客均戴上寫有超雲洋名Florinda的紅色頸鏈。	玉照小蛋糕 小蛋糕上印有超雲抱狗照，好睇又好食。

採訪：名人組、追蹤組