今年元宵節對鍾鎮濤（阿Ｂ）來說是分外特別，因有出世48天的小小Ｂ女Eloise加入，所以在元宵前夕一家炮製「愛心湯圓」，女友范姜將母親傳授的湯圓製法教鍾懿，不過，活潑精靈的鍾懿則創意無限，原本要她將粉團搓湯圓，她卻做了六個「雪人」出來，還逐一解釋是代表爸爸、媽媽、哥哥、姐姐、妹妹和自己。而妹妹Eloise亦識搶鏡，一時Ｏ嘴，一時甜笑，氹得阿Ｂ未食湯圓已甜晒。
有個好女友兼好媽咪范姜，阿Ｂ滿足說：「大家一齊咁多年有起有落，但點都好，節日係唔會忽視。」阿Ｂ教時下男士：「門面嘢一定要做，做完門面嘢，平時就好好過㗎啦！（你有三位情人？）係呀，依家成屋都係女人，Eloise新年前出世，淨收利是都有賺呀！」阿Ｂ大讚Eloise腳頭好為他帶來不少工作，三月十三日便要在台灣小巨蛋舉行溫拿演唱會，為表對台灣歌迷誠意，他和阿倫會演唱台語歌。
阿Ｂ謂今次到台灣演唱，Eloise更首次到台灣探婆婆，而嫲嫲亦赴台灣見孫女，加上大女在當地讀書，所以單是溫拿的親友便要包下幾架旅遊巴，浩浩蕩蕩到小巨蛋捧場。
