樂壇頒獎禮在一片爭議聲中閉幕，最惹人談論、歌手最夢寐以求的「最受歡迎歌星」，曾幾何時學友也置身其中有份爭奪，他笑說：「嗰時咁傻都有諗吓，（頒獎禮係遊戲一場？）嗰時冇當係遊戲，玩得好認真，唔知點解我都覺得好緊要。」

最受歡迎男歌星

92至95年是學友歌唱事業的巔峰期，經典金曲首首爆紅，大家一致認定他大有機會奪得「最受歡迎男歌星」，但偏偏一次又一次落空，他笑說：「都冇乜失望，因為實有（獎），嗰時實分到齊，仲有亞太區獎、金曲金獎等等，不過記得有年頒獎禮，我攞到兩首金曲，都有諗仲有得唔係（指最受歡迎男歌星）？」結果依然好夢成空，直至96年度頒獎禮，他才獲無綫頒「最受歡迎男歌星」獎。

遲遲才獲頒「最受歡迎男歌星」的學友，盛傳與他91年大無畏以無綫歌手身份亮相亞視「華東水災」籌款節目，因而觸怒無綫種下禍根，事隔十多年了，學友認真地想了一想說：「我冇乜諗大是大非，嗰時叫咪去，冇諗咁多，冇諗啱定唔啱，（咁咪戇居？）我不嬲都係咁，有時諗太多，有時又諗太少，（公司冇阻止咩？）可能佢哋覺得又唔係唱歌，上去呼籲啫，好似拍個公益廣告，無綫、亞視都會播咁。」

與亮相亞視無關

當年學友亮相亞視哄動全城，被形容為歷史性時刻，驀然回首，他說：「冇乜後唔後悔，冇乜相干，冇少條毛又冇少忽肉。」雖僅攞得一次「最受歡迎男歌星」，學友始終覺得與亮相亞視無關，他說：「係你就係你，唔係你就唔係，有時都要講天時地利人和配合。」

最近四大唱片公司跟無綫因版稅風波鬧翻，早已恢復自由身的學友，再次率先破天荒接受亞視專訪，他笑說：「依家冇包袱，我係咁樣喎，以前都係一腔熱血，熱血青年嘛，你諗就唔夠膽，冇諗就做咗。」

帶頭講被老婆話

對被標籤為「勇」者，學友反自嘲是衝動派，他說：「依家有時都覺得衝動，或者有第二啲方法選擇會好啲，好似四台聯頒問題，一講起又激動去講，但突然『登』一聲醒咗，我先反省到自己未必啱晒，點解係要拉埋四台一齊搞？其實我係想講希望有個具代表性嘅頒獎禮啫。」自嘲多年都未「化」的他笑說：「其實有時唔使講，（有人話過你嗎？）我老婆（羅美薇）囉，佢會話你唔使下下帶頭講，我明喎，但有時講自己觀點，我唔覺得係壞習慣。」

文：音樂組

攝：沈健程

場地：日航酒店

Make up：Terry Yu Hair-styling：Tommy Leung@ii salon