昨日劉心悠出席Lunch Actually的星級浪漫約會活動，早前該公司舉行了「星級夢想約會」比賽，勝出者就於昨日和心悠在中環蘇豪區一間餐廳共進午餐一小時，事後心悠表示一直對「相睇」感抗拒，但當「相睇」變成午餐聚會，感覺就截然不同，她笑說：「如果食晚飯就好似好認真咁，感覺有啲壓力，但食lunch就唔同，可以保持到一啲距離，但又可以傾到偈，了解對方，感覺安全又輕鬆！」

有共同話題

她又透露該男子二十八歲，在香港從事珍珠奶茶行業，她說：「我本身好鍾意飲珍珠奶茶，所以大家已經有共同話題，而且佢個人好有風度，感覺幾好，大家可以分享自己嘅事，好輕鬆，完全冇壓力，（有冇發展機會？）呢啲真係唔知，不過我哋交換咗email。」

阿媽仲心急

問心悠可有試過在網上認識陌生人？她即反應甚大說：「絕對冇，我唔會隨便加入陌生人做朋友，只會同識嘅人傾偈溝通。」

至於母親可有催促她拍拖？她笑說：「舊年我有兩個好朋友結婚，媽咪都有去飲，佢見到人哋結婚，都想我拍拖，所以佢仲急過我。」心悠坦言不會因為已屆適婚年齡而胡亂談戀愛或結婚，自己對感情事隨緣。

文：名人組