容祖兒下月演出音樂會，將在台上表演剝衫誘惑，她會着十三層衫然後逐件甩，揚言只甩剩貼身舞衣，祖兒自嘲身材謂：「史上最冇嘢睇，惟有件衫人睇。」
祖兒去年在新城頒獎禮狂掃六獎成女歌手大贏家，昨日率師妹鍾舒漫（Sherman）和泳兒出席新城團拜，並送上盆栽祝賀盆滿缽滿，祖兒更於3月7日演出音樂會，在虎年為新城先響頭炮。
一首歌甩一件
由於音樂會在亞洲國際博覽館舉行，祖兒視為一大挑戰：「我對呢個場又愛又恨，因為同觀眾距離遠啲，要加多幾錢肉緊，諗咗一件好勁嘅歌衫，有十三層，每首歌甩一件，甩剩舞衣。」記者取笑她：「冇衣？」祖兒沒好氣說：「係舞衣，跳舞嗰個dance呀。（甩剩泳衣？）到時咪知囉，總之貼身好睇。」
會否在台上大解放？祖兒說：「純粹視覺效果，依家觀眾要求好高，唔只耳仔享受，視覺上都要吃冰淇淋。（騷身材？）史上最冇嘢睇，惟有畀件衫人睇。（台上除衫同屋企有乜分別？）台上斯文少少，有人幫我除。」有提議叫嘉賓陳偉霆和洪卓立幫手除衫，祖兒笑說：「諗吓，到時睇吓邊個觀眾想幫手。」
鍾舒漫有壓力
Sherman會任嘉賓，她表示和祖兒合唱超級緊張，到時望實祖兒會有好多安全感！此外，新城董事總經理馬健生表示，電台在廣告收益連續五年稱冠，公司對成績非常滿意，今年將重點宣傳薛家燕和林盛斌（Bob，新香蕉俱樂部成員），並將3月定為家燕月，賀家燕姐60大壽。
文：音樂組