楊千嬅與丈夫丁子高婚後表現恩愛，昨日丁子高出席朱古力活動時，坦言想用朱古力做奶嘴，似乎有生仔意欲，但無奈千嬅工作太忙，今年的造人大計無望。
準備六位數利是
昨日丁子高與組合2R的成員黃婉佩（Race）出席「朱古力美術館by Chef Koo@海港城．美術館」，由朱古力大師指導二人炮製甜蜜朱古力。丁子高坦言最想整奶嘴造型的朱古力，似乎暗示想與太太楊千嬅生虎ＢＢ，不過，丁子高解釋：「整畀佢（千嬅）等佢好瞓啲。（有你喺身邊都唔好瞓？）好，再好啲，甜啲。（想唔想生ＢＢ？）等佢冇咁忙先。佢今年又要出兩張唱片、拍電影同開演唱會，都唔知做唔做得晒。（驚唔驚佢做高齡產婦？）唔驚，佢好健康，最緊要睇住佢唔好畀佢亂食嘢，因為佢好鍾意食。」提到早前千嬅生日，丁子高送了由自己設計的Ｒ字首飾給對方，以及三百六十五朵睡蓮，夠晒心思。今年二人首度派利是，他直言預算派五位數利是，但兩人加埋都要六位數。
Race朱古力冧仔
至於Race表示試過為男友做朱古力浸浴，問她是否鴛鴦浴，她否認說：「佢自己一個人沖，邊食邊浸，不過唔係好成功。我想喺情人節送個朱古力做嘅啞鈴畀佢，等佢一路食一路做運動。」她笑言男友非常愛吃朱古力，可以用朱古力當飯吃，但卻引來螞蟻入屋。
文：名人組