Jess最近不時性感現身頻見報，更惹來緋聞，早前參加好姐妹徐淑敏婚宴後，被傳搭上商人胡應湘兒子胡文新，據知Jess的機師男友曾因此打翻醋埕，但Jess在敏感時刻再度「犯規」，被發現與第一代「四葉草」男主角Eddie到銅鑼灣約會。

放大圖片	沈卓盈將衣服拼往李雨陽身上，表現細心。

當日Jess先與Eddie在日式餐廳內「撐枱腳」，男方更氹得Jess掩嘴狂笑。之後二人到附近的名店街shopping，Eddie耐心地陪Jess揀水晶首飾及手袋，Jess亦為對方挑選男裝，可惜最終「齋睇冇幫襯」。其後二人進入名錶店，未幾見Jess手持一紙袋離開似有斬獲，步出後即與Eddie分別離開。

冇晒神秘感

事後記者與Jess取得聯絡，她笑說：「咁都畀你撞到？（有人追？）唔係呀，Eddie同我係TVB同事，我想揀份禮物，所以搵佢陪我畀吓意見啫。（買禮物畀男友箍煲？）唔回應喇，依家乜神秘感都冇晒啦。（唔擔心男友因為你嘅緋聞打爛醋埕？）嘩！再講Eddie個女友呷醋就真，放過我哋啦。」

文：影視組