有傳祖兒疼錫師妹鍾舒漫（Sherman），更不惜將鞋借予對方以示支持，前晚祖兒、泳兒、Sherman、林峯、BIG FOUR等齊錄影《勁歌金曲》，祖兒被問及與Sherman聯手力抗泳兒做一姐的傳聞時，否認此事：「我哋嘅感覺係一家人咁，（一家人都會嗌交噃？）亦冇嗌交，大家各自努力，心裏面都想每個家庭成員有好成績。」

成功需靠自己

不過，祖兒承認曾借鞋予Sherman而沒借過給泳兒，只因身形和腳形均與Sherman相近，問到跟泳兒身形、腳形都不夾，「嘴形」又如何？祖兒笑言：「我哋好多時都有喺ＭＳＮ上聯絡嘅，（Sherman係新人會幫多啲？）如果自己有能力就會幫，之前師傅羅文教我唔好吝嗇自己嘅能力，咁係代表自己叻，但一個人嘅成功唔係靠人幫，而係自己努力得番嚟。」

泳兒亦指祖兒對她很好，只因尺碼問題而沒有借鞋，平日則會與身形相若的鍾欣桐（阿嬌）和蔡卓妍（阿Sa）互借衣物，她續說：「我初出道時祖兒都畀好多機會我，我亦唔會爭嚟爭去，只會默默耕耘，我都有同祖兒ＭＳＮ，仲試過發短訊畀佢講心事。」

Sherman亦力撐泳兒是好姊妹，至於有傳英皇為她爭奪無綫的「金曲金獎」，Sherman聞言說：「有冇咁激動？發夢至有，但如果係真會好多謝公司。」

期待夥拍千

此外，有傳邵氏因怕謝安琪緋聞影響林峯，而改用楊千嬅任其新片拍檔，林峯謂：「其實係故事、班底全部轉晒，不過我同千嬅已十年冇合作，所以都好期待！」

林峯澄清謝安琪「被飛」只因電影換了班底和故事。

BIG FOUR四子在台上又跳又唱，十分賣力。

文：影視組