本報昨日率先披露憑35D巨胸出位之27歲落選亞姐袁小曼，戀上48歲地產代理CEO廖偉強，不過報道曝光後，本報昨日收到一名自稱是廖偉強太太胞姊的梁小姐來電，梁小姐指廖偉強與妹妹結婚廿年，育有兩名分別十九歲及十四歲兒子，他們現於英國求學。她又稱妹妹未跟廖偉強離婚，對於妹夫今次高調與袁小曼晒幸福，梁小姐指妹妹感到傷心及痛心，還因此激到病。

大阪爭風呷醋

梁小姐直言遠從加拿大返港，力撐妹妹爭回老公，而在電話旁、梁小姐指她為廖太的女子，亦有插嘴說丈夫不是，梁小姐續說：「我個妹夫做咁大生意，我個妹唔想影響佢前途，一直將佢老公嘅嘢冇公開，點知佢今次搞單咁嘅嘢，你叫我個妹點見人？兩個小朋友點面對同學仔？我個妹未同佢離婚喎，咁對我個妹好唔公平。（廖太插嘴）對兩個仔都好唔公平。」

據資料顯示，廖偉強曾任職推銷員，梁小姐稱：「當年佢係行街佬，斗零都冇，我都畀個妹嫁佢，依家佢咁做，我係頂佢唔順，簡直逼虎跳牆，我同個妹講，必要時出嚟澄清佢至係廖太。（袁小曼話做少奶奶？）你叫佢唔使諗啦，佢要做廖太，咁我個妹係咩？舊年我個妹一家四口去大阪旅行，個女人走埋過去搶男人，我個妹夫竟然跟個女人走，當住兩個仔面前，廖太仲忍，你話死未！」

本來梁小姐相約記者下午到其胞妹位於貝沙灣之寓所做訪問，記者依時到上址，向保安員講出要到訪的單位時，保安即說：「你哋搵廖太？」惟記者按單位對講機卻未獲回應。記者致電梁小姐，她指妹妹情緒不穩，身體不適要去看醫生，訪問暫時告吹。

夫妻關係麻麻

廖偉強昨晚跟袁小曼到尖沙咀晚膳，對於爆料內容，他說：「我承認係結過婚，有兩個仔，我同前妻已分居，喺09年頭搞離婚手續嘅時候，我已經搬離貝沙灣，但喺舊年七月時曾經為咗處理細仔嘅入學問題，搬返貝沙灣住咗兩個月，之後又再離開。喺09年12月前妻出咗封律師信話願意同我離婚，我同前妻關係麻麻，但我係搬出嚟住先追求小曼，對佢公平啲，如果前妻依家唔肯簽紙，我咪等多一年，等正式分居兩年就可以離婚。我識小曼嘅時候已經講晒畀佢知，我單身有權做自己嘅事，而去大阪件事喺08年底，為咗陪兩個仔先去，去到同前妻分房瞓，但當時我未識小曼，所以搶人單嘢係百分百亂講。」

文：影視組