性感女神豆斗當年係唔少男士嘅夢中情人，自從嫁咗身家億億聲嘅沈嘉偉之後，就絕迹娛樂圈。佢咁多年嚟咩公開活動都唔去，就知豆斗疊埋心水印印腳做少奶奶，加上佢又生咗兩個囡囡，當然專心相夫教女。

醒目通水

早幾晚十一點幾，八太見到豆斗同埋老公沈嘉偉，約埋幾個朋友去咗跑馬地一間日本料理食消夜，成班人食到凌晨兩點幾先走人。戴住黑超兼素顏上陣嘅豆斗，同老公一馬當先行出嚟，邊行邊傾去攞車。鬼咁醒目嘅豆斗，同班朋友拜拜時就發現八太，仲細細聲同老公講咗幾句，沈嘉偉就即刻四圍望。唔夠兩秒，原本戴住黑超嘅豆斗，擒擒青除低副超，一臉自信眼仔碌碌望住鏡頭，明知真面目入鏡都冇有怕。

豆斗鬼咁心急除低黑超晒素顏，雖然四張有多，不過依然省鏡。	沈嘉偉向友人拜拜後，同老婆揸車返屋企。	沈嘉偉（右）日前與細佬消夜，但未夠十二點就返家陪老婆。

返家慰妻

得喇！沈師奶，知你咁多年唔使辛勞養尊處優，雖然今年都四十有一，但依然咁鬼省鏡，唔怪得沈嘉偉除咗車之外，最愛就係你啦！講開沈生啲車，嗰晚同豆斗撐完枱腳後，第晚八太又撞到佢揸架四驅車同細佬去食消夜同遊街，不過未夠半夜十二點，佢就返屋企慰妻。