Elanne一直很欣賞擁有音樂才華的林俊傑，早就特別託中間人邀對方任其處女個唱嘉賓，JJ一口答應，令她興奮不已，日前她要到杭州工作，得知JJ在上海參加除夕倒數活動，她就提前在元旦日到上海密會JJ，她笑說：「大家食咗餐飯，傾咗好多音樂嘅嘢，佢好Nice、個人又Sweet，（有冇撻着？）第一次正式見面咋，唔會諗呢啲，識耐啲食多幾餐飯先算。」

逼住啃東坡肉

由於演唱會舉行在即，連月來進行地獄式修身的Elanne，練得健碩腹肌，加上節食戒油戒鹽，廿二吋纖腰弗到爆，怎知上海行令她火速增了兩磅，黃蜂腰消失了，她笑說：「我哋餐飯叫咗二十道主菜，JJ仲夾東坡肉畀我，我禮貌上梗係要食，破晒戒肥咗兩磅，返到香港即刻要地獄式狂操。」

Elanne跟JJ一見如故，暢談星座，兩人更有共同喜好，原來兩人都愛吃快餐漢堡包，她笑說：「我有諗過演唱會去麥當勞搞慶功㗎。」席間兩人互相交換新碟，Elanne更膽粗粗主動開口請JJ為她寫歌。

文：音樂組