近期3D電影成大熱，連帶武俠漫畫亦將3D化，漫畫家黃玉郎日前為漫畫新書《春秋戰雄》宣傳，直言3D片將成為大趨勢，他鐵定今年開拍兩部由漫畫改編的電影《神兵玄奇》和《龍虎門2》，為了迎合市場需要，亦會不惜工本斥資過千萬以3D製作。

甄子丹片酬高

黃玉郎談到兩片的卡士陣容，他透露希望邀請人氣偶像吳尊拍攝《神》片，並飾演具有正義感的南宮問天，他說：「吳尊本身好帥氣，加上同故事入面嘅男主角外形好似，一樣咁大隻，所以想搵佢演出。」黃玉郎又表示該片將不惜工本拍成3D片，他說：「3D電影係市場大趨勢，我覺得成本貴啲無所謂，觀眾一定會鍾意睇，同埋要入戲院先睇到效果，唔通喺屋企戴3D眼鏡睇咩。」

由甄子丹、謝霆鋒及余文樂演出的《龍虎門》，在06年上映時叫好又叫座，黃玉郎表示雖然很想與子丹再合作，不過子丹身價今時唔同往日，片酬亦是考慮要素之一，他說：「佢貴為09年最賺錢男星，好難夾檔期，片酬係一個大問題，如果請唔到子丹拍續集，會考慮搵新人，將多啲資金放在後期製作上。」

新作籌備近年

此外，黃玉郎的新作《春秋戰雄》將於明天出版，他透露整個構思及創作一手一腳參與，籌備足足大半年。他說：「呢個故事講春秋時代，有好多成語典故，之前好少漫畫家寫呢類故事，我覺得除咗古仔吸引，亦令青年人認識多啲成語典故。」

文：專案組