家輝憑《証人》榮登亞太影帝後，昨午急急返港，小休後今日再為《綫人》復工。英皇電影派出代表往接機，更為家輝送上香檳道賀，不少旅客認出家輝，忙不迭趨前拍照。談到再次得獎，家輝坦言：「攞埋呢個獎，為09年畫上圓滿句號，但希望嚟緊仲有好多頓號、感嘆號啦！其實我事前都擔心攞唔到（亞太影帝），咁咪少咗一撇囉。」

老婆聞得獎嗌不停

由於頒獎禮當晚花蓮發生6.8級地震，令直播訊號一度受干擾，家輝坦言首次遇上強力地震，不過「唔識死」的他謂：「覺得好似坐緊船咁，但年輕膽大唔驚，或者因為震一震個獎跌咗落我度添。反而after party嗰陣，朱茵睇到煙花忽然尖叫，我仲以為有嘢『冧』咗落嚟。」家輝似乎整晚與尖叫聲甚為有緣：「我同老婆通電話，佢知道我攞獎即刻尖叫，之後問我係咪同人平分，我話唔係，佢又再尖叫，搞到個女學埋佢啲嘢。（張榕容公開多謝你？）因為佢知我頒女主角獎，事前叫我頒畀佢，點知開口中。」

家輝揚言會自掏腰包，待電影煞科後與台前幕後食「關機飯」，連帶補祝早前奪得金馬影帝。當問到《綫》片的演出可會令他倍感壓力時，他坦言：「唔會，所有獎項都只不過係鼓勵嚟啫，唔應該將佢哋帶入實際嘅工作內。（加片酬？）加到六千萬呀？呢啲嘢市場決定嘅。」

張家輝獲英皇高層送上香檳恭賀再登影帝。

朱茵前晚睇煙花時忽然尖叫，嚇壞家輝。

孖霆鋒拍古裝喜劇

當家輝受訪時，剛從馬來西亞回港的Kelly即為舊拍檔送上祝福，問二人可有考慮再度合作？Kelly謂：「又《大事件》呀？梗係想啦，最好拉埋任賢齊，拍家輝最拿手嘅警匪片，又或者喜劇都好。」另外，王晶透露明年五、六月撮合家輝與謝霆鋒合演古裝喜劇《財神客棧》，拍攝地點待定，家輝「奉旨」扮演帥哥，但卻不肯透露霆鋒會否扮醜。

文：影視組