昨日Kelly身穿低V連身裙及四吋高跟鞋出席金至尊珠寶新店開幕，戴着千五萬鑽飾和一枚十三卡、價值千二萬鑽戒的Kelly貴氣逼人，不過Kelly擔心表示：「咁大粒鑽戒，搞到我唔敢同人握手，驚啲人會搶走呀！」而港姐陳茵媺和張嘉兒亦同樣佩戴百多萬元的鑽飾示人。Kelly主持剪綵儀式後，即獲金至尊副董事長、千億新抱徐子淇父親徐傳順送上一條價值萬元的鑽石頸鏈，令Kelly笑逐顏開。

第一份聖誕禮物

雖然Kelly身上的鑽飾閃耀全場，但她仍不忘選購一粒價值五萬元的一卡鑽石給蝦餃仔，Kelly說：「呢份係我第一份送畀囝囝嘅聖誕禮物，之後每年我都會送一粒畀佢，送到佢娶老婆為止！（買粒好似手上咁大嘅十三卡？）唔會喇，我驚佢見到粒石咁閃令令咁得意會吞咗落肚！（老公冇份？）老公唔要啦，佢都唔戴鑽飾嘅！」Kelly同時亦選了一條價值六千八百元寫有「幸福」的金頸鏈給經理人鍾珍，認真有心。

陳茵媺（右）與張嘉兒示範名貴鑽飾。

徐子淇的父親送上價值萬元的鑽石頸鏈給陳慧琳。

陳茵家藏后冠

另外，陳茵媺和張嘉兒坦言家中最貴重的鑽飾是港姐的后冠，並珍而重之安放在家中夾萬，張嘉兒說：「我好少戴呢啲咁大粒嘅鑽飾，驚男朋友送求婚戒指時有困難！」而陳茵媺則透露，會努力儲錢購買一粒大鑽戒送給母親。

採訪：音樂組