唐詩詠早前狠撇花心男崔建邦，但昨日竟然於不知情下與「情敵」中巴混血兒鄺敏慧碰面，詩詠全程避席後台，及後雙方被拉攏合照，詩詠一臉尷尬之餘，還企得離行離列，事後直言不認識對方，又指食巴西菜熱氣，寸爆舊愛。
有傳崔建邦為J2節目《打出十人巷》當客席導師時，與有份參選的鄺敏慧撻着，詩詠獲悉後即與崔建邦分手。昨日兩位女主角同場現身活動，明顯消瘦的詩詠處處迴避「情敵」，活動流程原先安排詩詠與楊愛瑾（Miki）為鄺敏慧打扮成小公主，最後卻只得Miki獨撐，活動過後詩詠亦要中間夾着個Miki，才肯與鄺敏慧合照。
頂硬上合照
其後Miki接受電子媒體訪問，詩詠在記者要求下頂硬上跟鄺敏慧合照，但二人仍有一個身位的距離，鄺敏慧見狀即走近詩詠，但詩詠又愈行愈過，場面尷尬。
詩詠坦言事前不知會與對方同場，但仍尊重大會做好工作。問為何拍照時不斷迴避？詩詠謂：「唔識好難，同Miki熟啲。（咁安排會唔會唔開心？）有工作好開心。」而她又否認失戀，表示與崔建邦是朋友關係。
巴西菜熱氣
問到會否勸喻對方不要吃巴西菜？詩詠即寸爆謂：「巴西菜咁熱氣我唔食，人哋食咩我唔理，崔建邦鍾意食韓國燒烤都熱氣，叫佢做多啲Facial囉！（仲有冇同崔建邦見面？）做嘢成日見，大家同一個經理人，係拍檔，唔會叫公司刻意唔安排我哋同場。（鄺敏慧靚唔靚？）冇留意喎！」而鄺敏慧亦表示不知會與詩詠同場，對於跟崔建邦的關係，她表示沒有單獨約會對方，暫時只是朋友。而崔建邦對於事件表示不作回應。
文：影視組