莊思敏：實會告發佢
我覺得模特兒形象好緊要，會好大影響，唔應該咁唔珍惜自己，我覺得應該要受罰，唔單止model就算普通人，罰先起阻嚇作用。以前都聽聞過有model濫藥，心裏有數估到係邊個，不過我相信仲有其他o靚模有呢個情況，如果我知道係邊個一定會鬧兼告發佢。（男友吳浩康都試過濫藥？）佢改過後，都好積極出嚟同大家分享，回響都幾好。
A. Lin細膽say no
我冇見過模特兒吸毒，但自己就一定冇試過，曾經有朋友叫我試下，因為我好細膽，更重要係知道唔可以掂毒品，所以即刻拒絕。
Jocelyn：冇染壞習慣
我唔知有o靚模涉嫌吸毒，希望佢冇事啦。喺美國模特兒圈成日都聽到有呢啲情況，姬摩絲都曾經畀人傳過，我喺好好嘅環境成長，唔會感染到呢啲懷習慣。今次係第一次聽到有人吸毒。（有冇畀人引誘？）呢個世界乜嘢人都有，唔會有人逼你濫藥，自己要識得處理，我覺得喺日本和紐約濫藥嘅情況仲嚴重過香港。
諸葛梓岐：千祈咪傻
嘩！我冇聽過，不過唔覺得出奇，都估唔到係邊個，冇聽聞過呢啲唔尋常嘅交易，工作時喺後台亦冇見過有模特兒食藥嘅唔尋常情況，如果我見到有人食，會叫佢唔好咁傻，做model工作壓力大，但千祈唔好濫藥去發洩，對身體唔好又損害形象。
Jessica C.拒絕濫藥
聽到都好傷感，我冇聽過或見過模特兒圈有人濫藥，去旅行就成日見到啲人有濫藥情況，但我同男友都會避開，唔會同藥物拉上關係，我哋係good girl與good man，亦冇試過畀人引誘。就算平時去飲嘢，對自己杯嘢飲都會小心。
周秀娜：點會食狗糧
我相信每個行業都有枯枝，希望知錯能改，好好珍惜前途、珍惜生命，而且黎明都有教，人邊可以食狗糧呢！