徐濠縈剛榮獲傑出衣着獎，不過網友卻群起圍插，更踩埋其夫陳奕迅（Eason），嘲諷兩人着衫核突，甚至連設計師何國鉦亦封阿徐為「名牌奴隸」。
近年被指是潮流icon的阿徐，於上周四獲頒「十大傑出衣着人士」獎，不過品味高低見仁見智，阿徐獎項到手短短七日仍未抱暖，在討論區已爆發網友圍插戰，大彈她的衣着冇品味。
勁彈衣着冇品味
在香港討論區和she.com都有大批網友留言踩阿徐，網友lcp1978：「你哋覺唔覺得Eason老婆着衫好核突，名牌喺佢身上一啲都唔靚，咁都攞到傑出衣着獎，到底咩準則㗎？！」、網友ncmc：「佢個樣潮唔起，同Eason一樣。」、中國女排：「佢嘅品味我唔識欣賞，只可以講佢嫁到個好老公畀咁多錢佢買靚衫，佢先有機會可以拎衣着品味獎，佢絕對係衫着人。」
不過，亦有網友認為阿徐着衫幾型，替她平反，如網友koayu：「講真，潮流嘅嘢，你識鬼咩？有咩資格去評人點着，有時我都覺得外國行show嘅model啲衫係亂搭，但其實唔係。」、網友瑪斐爾：「我覺得佢着得幾型。」
何國鉦：係名牌奴隸
究竟阿徐着衫有冇品味？本報訪問了時裝設計師何國鉦，他說：「當年佢仲係藝人時唔識着衫，依家喺衣着下咗苦功，有自己style，佢性格同氣質好啱佢依家走嘅型格路線，不過有啲人覺得佢只識買名牌，唯一可以話佢係名牌奴隸，但唔代表唔靚，花得起錢唔係壞事，奴隸都有自己style，起碼唔會着到騎呢，可能網友覺得佢cool，唔係咁平易近人，但站喺設計師角度，我覺得佢着衫唔核突，冇胸冇籮但冇刻意暴露，冇壞事。」
而形象指導張學潤則說：「阿徐識fashion，着衫有自己風格，古怪誇張嘅衫都可以carry到，我欣賞佢着衫。（有冇要改善？）佢做咗媽咪，年紀一路大，可以轉吓風格，唔使咁前衞。」
文：音樂組