新片《2012》講述有關瑪雅古文明年曆所預言有關二○一二年世界末日的來臨，曾表示厭倦拍災難片的羅蘭表示，接拍此片因重點在於描述人性化的一面，表達人類互相幫忙求生的精神，他說：「原本係想講有關聖經故事挪亞方舟，但後來發現瑪雅曆之後，就將兩個概念結合。」

戲中飾演作家的尊古錫要帶家人逃離快沉淪的加州，場面驚心動魄，尊說：「有一幕飛車逃走嘅場面，由場景嘅大廈、整條街到棕櫚樹都係起喺啲水力計算嘅板上面，揸車嗰時搖得好厲害，希望觀眾會感受到個大製作。另外亦有拍雪山，我從未見過咁大嘅場景，雖然演戲要靠幻想，呢場已經夠晒豐富畀演員演戲。」

角色騎呢有趣

電影中除了尊古錫及Chiwetel飾演科學家幫政府救亡外，亦有一個經常抱着芝娃娃、貌似Paris Hilton的名媛角色，以及俄羅斯富豪的肥孖仔，均非常突出。提到有寸Paris之嫌及影射政府的劇情，尊即詐傻扮懵否認，而羅蘭則說：「只係諗到要起方舟嘅話，一定係富豪出錢。初時我哋先有對孖仔，後來好鍾意佢哋，所以再搵人演富豪爸爸。我鍾意呢類騎呢角色，係有趣嘅配搭。自己向來對政府抱懷疑態度，覺得就算政府知道都唔會公開消息，怕引起恐慌同股市會冧。」尊更指初時看到劇本，片中講他無意中發現政府有不可告人的項目橋段時，令他想起史提芬史匹堡的舊作《第三類接觸》，感覺很酷。

若然二○一二年真的世界末日會有何計劃時，尊古錫說：「我會游吓水，同家人朋友度過，去啲未去過嘅地方，例如南美洲。」羅蘭則笑言：「我唔信會發生，如果真係嘅話，就請晒啲親戚朋友去高山搞個滑雪派對。」尊聞言即報名參加，而Harald則笑言要趁機碌爆信用卡，Chiwetel則指想多拍一部片才去旅行。

當問及對導演波蘭斯基可能被引渡返美一事，羅蘭表示因為事件已相隔多年，對他被捕感到奇怪，並說：「佢嗰時太太被殺，又迷失於藥物，連受害女子都問點解要拉佢，佢又生活得好好，所以覺得好似係地方檢察官想出位。」