關菊英在無綫古裝劇《宮心計》中，飾演司級掌官阮翠雲一角，與米雪、佘詩曼、楊怡等大鬥演技，而首次參與古裝拍攝的菊姐，直言今次拍攝是她從影以來，最高難度的一套劇，而拍攝期間令她最難忘莫過於拍攝一場嚴刑拷問的鏡頭。

死背對白

菊姐表示：「初初都好擔心古裝造型唔靚，之後睇番都覺得幾好，其實今次最大難度係讀對白，我向來講對白都好快，所以驚舉手投足唔似古裝，而且今次啲對白都好難，唔係白話文，一味要死背啲對白，所以挑戰好大。（有冇邊個鏡頭最難忘？）我最難忘係拍畀人夾手指，同埋畀人打pat pat鏡頭，夾手指係真夾，而拍打pat pat嗰日就好熱，拍嘅時候好多蚊，所以真係幾辛苦。」

菊姐又表示今次已第三度與米雪及楊怡合作拍劇，感覺十分親切，她謂：「今次我又要打楊怡，上次《家好》已經要打佢，今次就要掌佢個嘴，拍呢場戲我都驚會打親佢，起初借位嚟拍，搞到NG幾次，之後佢叫我唔好就住，真係打落去，我真係打到佢個嘴腫咗，佢成日都畀我打，真係非常慘。」

望得佳績

雖然今次拍攝十分辛苦，不過菊姐認為值得，揚言希望《宮》劇收視可以突破《大長今》，她表示：「萬二分希望今次收視可以破《大》劇，因為大家都出咗好多力，加上今次拍攝係我最辛苦嘅一次，當然想取得好成績。」

文︰影視組