謝安琪師妹麥家瑜（Keeva）剛推出同名專輯，正式成為○九年樂壇各大頒獎禮候選女新人，唱片首賣當日，Keeva穿上魚網絲襪大晒美腿，現身鬧市唱片店巡視兼造勢，fans們將現場擠得水洩不通，令Keeva甚為感動說：「可能講得好誇張，但嗰種開心真係非言語可以形容，今日好多公司同事、歌迷、家人同朋友都有嚟支持，佢哋都係陪住我長大，係對我好重要嘅人。」

雙手護胸

由於人數眾多，混亂間Keeva絲襪更被鈎破，天性率真的她發現後，哈哈大笑說：「真係又從實戰中上一課，依家知道下次點樣先唔會鈎爛絲襪！」排在最前，等候從Keeva手中接過專輯的忠實男歌迷，勁掃24隻為Keeva湊夠幸運數字$2,280，獲Keeva大讚有心思之際，卻被要求索抱，向來愛錫fans的Keeva，即時大反應以雙手護胸，不過最後仍答應fans要求，她說：「聽到真係嚇咗一跳，男女授受不親嘛，之後排隊嘅fans仲有樣學樣，好似變咗抱抱會咁，不過我知道佢哋係想為我送上最親切嘅鼓勵啫（索吻得唔得？）吓，冇諗過喎，淨係女仔得唔得？」

麥家瑜應歌迷要求送上抱抱。	Keeva獲不少粉絲支持，信心大增。	麥家瑜在混亂中絲襪也被鈎破。

老外撐場

到場力撐Keeva的歌迷中，不乏型仔少男，當中更有外籍人士，順勢成為新一代「少男殺手」的Keeva就靦腆說：「呢個名我唔敢當，係大家畀面先咁講啫，今次出碟最大期望係想多啲人聽到我嘅音樂。」

採訪：音樂組