現年37歲的Dino將於十五日與拍拖四年、小他七歲的女友Nancy正式註冊結婚，當日更會在數碼港某酒樓註冊及擺酒，而早前二人在一家婚紗公司贊助下，拍攝一輯只穿便服的「婚紗照」，Dino笑言：「因為我哋意大利人唔會喺結婚前見到新娘子嘅婚紗，所以影相當日只係着便服，啲相影出嚟好自然，我哋仲搵埋啱啱養咗冇幾耐嘅十個月大唐狗『Mr Brown』一齊影，當正佢係一家人！」

太太設計請帖

至於請帖則由身為畫家的Nancy一手一腳設計，請帖以金色和紅色作配搭，上面印有大大個囍字，囍字兩邊是一對新人的中文姓氏，中間則畫有Dino和Nancy的中式漫畫樣子，二人身上均畫上寓意吉祥的龍和鳳，亦保留了Dino的「羊咩鬚」，而下面則印有「NANCY WONG ＆ DINO ACCONCI」字樣，別出心裁。Dino亦大讚未婚妻畫工了得：「佢用咗唔夠一日就完成，我除咗好滿意之外仲好欣賞佢！」

婚期將近，Dino的心情亦愈見緊張，但他揚言不畏懼任何接新娘遊戲，並透露當日的婚禮環節：「我嗰朝早會六點起身，準備八點半接新娘，夜晚就會喺酒樓擺酒，希望嚟嘅親友都能感受我哋嘅喜悅！」據悉Dino曾邀請黃貫中擔任兄弟，惜對方要到內地做騷而未能答允，其他受邀賓客包括bma老闆羅傑承夫婦及旗下所有歌手、盧巧音、許懷欣、Kolor及肥媽等。

文：音樂組