謝天華的太太Tina昨日下午時分被發現送入律敦治醫院，於急症室外臥床的她狀甚痛苦，記者見天華一直陪伴在側，更不時細心的為她抹汗，事後據天華指，原來太太因胃抽筋而送院，現已無大礙。

天華與太太Tina表現十分恩愛。

天華人氣急升即惹上緋聞，他慨嘆說：「真係要多謝laughing哥帶挈。」 （資料圖片）

laughing哥好帶挈

不過另邊廂有指天華於夜店玩魔術識女仔，對方是拍過電影的新人艷星王璐瑤，記者致電給天華時，他表示有印象對方只是朋友的朋友，連名都不記得，對於現時天華人紅，對方有博宣傳之嫌，天華謂：「都知依家好多呢啲嘢，咁真係要多謝laughing哥帶挈。」

對於這位王璐瑤，天華表示對方當晚表示自己喜歡拍戲，主動問他有關拍戲的事，但他說：「咁我冇理由唔答人啫！（咁你有冇同佢玩魔術？）我做乜要同佢玩魔術！」有指天華致電約她，天華無奈的謂：「我做乜搵佢出去，佢講到天花龍鳳都得㗎啦！佢要借題發揮我都冇辦法，我亦好無奈，佢就算喺blog寫乜我都阻唔到佢。」

幾難避忌

天華蒲夜店屢傳緋聞，問他會否減少夜蒲，他謂：「我唔能夠唔同所有人傾偈，都幾難避忌，唔通個個同我影張相又話同我呢樣嗰樣咩！有時好多嘢要有證據，唔係亂講出嚟就得。」問太太有否向他「詐型」，他坦言：「太太明乜嘢事，唔使多講！」

文：影視組