跳舞組合BRO5成員何浩文（Dominic），原來是兩年前才開始學跳舞，他稱：「以前細個學開鋼琴，仲學到五級添，後尾覺得唔係太適合自己就放棄咗。其實本身我係一個鍾意運動嘅人，溜冰、籃球、足球我都鍾意，所以對跳舞咁有興趣。（幾時開始學跳舞？）兩年前左右，嗰時我去英國讀書，識咗班跳舞嘅朋友，玩吓玩吓就覺得好啱自己喇。」
就是因為培養了對跳舞的興趣，Dominic回港後每星期都會到排舞室練舞，亦因而備受賞識加入娛圈，他回憶道：「有日我排排吓舞有人叫我出去，初初好驚，以為佢鬧我未交場租，後尾先知原來佢哋係想叫我加入BRO5，加上我鍾意唱歌，咪試吓囉！」談到最欣賞的跳舞歌手，Dominic笑指是韓國天王Rain：「佢身形好靚，表演好有吸引力，如果我第時有佢一半咁叻就好。」