伍詠薇、商天娥、夏雨、梁靖琪（Toby）、楊思琦昨日出席無綫新劇《翻叮一族》造型活動，Toby透露在劇中與陳鍵鋒飾演情侶，而敖嘉年就會狂追她，提到早前有報道指她介入黃宗澤、胡杏兒之間戀情，Toby認為報道不實，所以不作任何回應。
Toby說：「多謝佢哋咁早就幫我宣傳。（次次你都係第三者？）係啦，唔知敖嘉年有冇女友，如果冇，我想同佢傳，唔想成日畀人話我係第三者，咁多次傳緋聞，淨係同吳卓羲傳係最正常唔話我係第三者。（幾時搵個真命天子？）緣分到先得㗎，如果有一定會介紹畀大家。（心唔心急呀？）希望三十歲前拍拖，三十五歲結婚。」Toby身形明顯消瘦不少，她透露近日減少食量，勁減十五磅，就連cup數亦降。