日前柏豪跟Zelia被發現於時代廣場出現，可能怕被人認出，柏豪成日耷低頭，但他跟Zelia的情侶帽不禁令人注目。兩人首先到戲院睇戲，甫進戲院即密密斟揀選心水電影，買飛後兩人有默契地快步轉身搭電梯上戲院。兩小時後睇完戲，柏豪跟Zelia前後腳往停車場取車。雖然只是短短的路程，但柏豪全程都保持高度戒備，不時警覺地左望右望，當發覺四圍無人時才放心跟Zelia愈行愈近，不僅輕撫女方手臂，更疑似跟對方十指緊扣。
一碗麵兩份食
然後柏豪充當柴可夫載Zelia到大坑大牌檔歎下午茶，兩人各自點了飲品，卻只叫一碗麵分甘同味。期間柏豪不停說笑逗Zelia開心，又乘機捉實Zelia手仔睇掌紋。兩人在街邊食麵一樣開心，不時對望甜笑，儼如熱戀中情侶。二人卿卿我我之際，柏豪突然發現記者在場，惟有急急埋單鬆人，驅車載女友離去，並多次踩行油撇甩記者。
身為柏豪師妹的Zelia，早前為對方新歌《夠鐘》MV擔任女主角，更有不少親熱鏡頭，據知兩人因經常見面暗中撻着。雖然早前盛傳柏豪以SMS攻勢力追江若琳，但其實柏豪鍾情Zelia早已露出端倪，早前他承認新歌《Lovin' You》是寫給一圈中女仔，更透露對方「可能係模特兒或者同公司藝人」，暗中確認女友身份。
師兄妹易生情
所謂「近水樓台先得月」，圈中有不少緋聞男女均是師兄妹關係，因在工作上接觸較多而擦出愛火花！
James、Kama
靚仔有型的James，被踢爆與同公司的羅凱珊（Kama）蜜運，二人曾被拍得一份沙律兩份食兼互餵愛心靚湯，情到濃時二人更當街互搣面珠，sweet爆！
洪卓立、湯怡
洪卓立與師妹湯怡因工作關係日久生情，兩人更曾被撞破拍拖睇戲，雖然當天有其他人在場充當「電燈膽」，惟湯怡仍禁不住挨埋Ken身邊，情侶關係即曝光！
方力申、鄧麗欣
方力申與鄧麗欣（Stephy）合作無數，緋聞傳足6年。近日Stephy確診豬流感，小方處處維護被指「冇公德」的Stephy，更罕有扯火寸記者，親密關係不言而喻。
文：音樂組 攝：追蹤組