因負面新聞心情已跌至谷底的Yumi，前日竟遭師姐Wylie落井下石，指她「男女關係混亂」兼「過分」，又大爆Yumi「手緊」。Yumi被師姐Wylie出言狂踩，昨日即出招連環反擊，首先Yumi前晚在Xanga網誌張貼了一篇「我有好多嘢想澄清」的文章，力斥Wylie在不知就裏的情況下胡亂說她手緊及指其剛分手的男友Jamie有女朋友，Yumi在文章中又說在公司內與陳若嵐（Melody）關係最好，言談間暗示與Wylie感情欠佳，二人不和關係呼之欲出。

明顯清減不少的Yumi昨日接受本報獨家專訪，談到Wylie前日的言論，Yumi直斥對方立心誣衊，愈說愈激動的她在訪問中途更撲向女助手痛哭，要女助手出言安慰才得以繼續接受訪問。

Yumi：尹　記者：記

記：對於Wylie前日嘅言論，你有咩回應？

尹：我都唔明點解發生啲咁嘅事，Wylie同我同一間公司點解都唔幫我？我最唔開心係佢根本唔知真相就亂話Jamie有女朋友，不嬲我同佢（指Wylie）都冇乜兩句。

連阿媽都唔信我

記：最唔開心佢話你啲乜？

尹：最唔開心佢話我手緊，仲話食飯幫我畀錢，根本從來我哋都唔會一齊食飯。（語氣激動）Wylie話我手緊嘅報道出街之後，媽咪今朝一早就衝入嚟我間房問我點解要問人借錢，我話我冇，但係媽咪話Wylie係咁講，我真係好唔開心，估唔到連屋企人都信佢唔信我！

記：咁你係咪手緊？

尹：絕對唔會，其實寫真集出街之後，我一直都有好多工作，銀行都有啲積蓄。（語氣酸溜溜）當然我冇Wylie咁幸運屋企有錢，我阿爸就嚟退休，所以我嘅經濟負擔都幾重。

記：覺唔覺得佢出賣你？

尹：佢講嘅唔係事實，所以佢唔係出賣，而係誣衊我！（眼泛淚光）其實不嬲我同Wylie最多只會打招呼，連嘢都唔講多句，佢從來都唔會打電話畀我，佢又點會知我咁多嘢？

情緒化扮大家姐

記：Wylie係咪一直都同你不和？

尹：其實佢恰我一早有前科，之前我錄賀年歌遲到，佢除咗好惡咁鬧我之外，之後啲工作人員問我食咩飯，佢唔畀我揀，佢話遲到啲人出咩聲喎！

記：佢仲有冇其他嘢對你唔好？

尹：佢份人好情緒化，心情好就同你講笑話，心情唔好就搵人發洩，總之語氣唔好。而且佢份人好有主見，鍾意人哋聽晒佢講。

記：覺得佢扮大家姐？

尹：都係㗎，反而夢夢冇乜點樣話過我。

記：係咪唔知以後點面對Wylie？

尹：我不嬲都唔敢同Wylie講嘢，以後會更加小心，絕對唔會同佢傾心事。其實我依家好多嘢都逼自己做到最好，都係因為Wylie，事關我唔想畀佢捉到痛腳，佢一捉到我啲錯處就會周圍唱我，仲要喺記者面前講。

記：畀人話完爆房，之後又畀Wylie落井下石，心理壓力係咪好大？有冇諗過自殺？

一星期激瘦8磅

尹：咁我真係冇諗過自殺，但今次個難關真係好難過。自從報道出街之後，我晚晚都瞓唔着，又食唔落嘢，短短一個星期瘦咗八磅，我有諗過睇醫生，攞啲安眠藥返嚟等自己好瞓啲。

記：有冇為呢件事喊過？

尹：雜誌報道出街之前嗰日我喊咗十個鐘，其實個記者前一日已經拎咗啲相畀老闆林建名睇，佢睇咗好嬲，即刻叫咗我同公司啲人上佢屋企，佢鬧咗我兩粒鐘，問我點解咁亂嚟？當時我已經驚得好緊要，擔心影響事業。

記：咁件事對你事業有冇影響？

尹：有呀，本來有幾個廣告傾緊，但依家對方話要考慮吓囉。

記：有冇後悔同男友去酒店過夜？

尹：有，我以後都唔會做呢啲嘢，雖然呢啲嘢正常男女朋友做都OK，但我係公眾人物唔應該咁做。同埋我以後都唔會當街畀錢任何人，唔想畀人再亂寫。我真係冇援交，話我為咗幾百蚊做呢啲嘢？其實無論幾多錢我都唔會咁做。

記：你同髮型師Jamie究竟咩關係？

尹：我同佢真係分咗手，我哋係因為性格不合分手嘅，對佢我覺得好內疚，因為呢排佢媽咪病重，佢已經好煩，依家仲要搞到佢煩上加煩，我真係好唔好意思。但佢都好好，仲好支持同關心我，咁好嘅男仔畀我連累咗真係唔好意思。

對於Yumi的「反指控」，Wylie透過經理人公司表示暫不作任何回應。

http://yumi-wanchunhei.xanga.com/home.aspx?user=yumi_wanchunhei

文：專案組