Stephy的愛情小說因「錯字百出」而遭喪插，但昨日她依然假元朗某商場為「錯字書」舉行「陪着我走」簽唱會，有約四百歌迷排隊支持外，亦吸引到三百多人圍觀，場面墟冚。未知是否酷熱天氣關係，玉女Stephy身穿貼身低胸背心，32A上圍神奇地出現「波罅」，而其短裙亦有乾坤，其高衩設計，隱約從裙隙中竊視到Stephy的肉髀，雖然性感度屬微不足道，但物以罕為貴的香艷，仍令人眼前一亮。

搵專人校對

Stephy接受訪問時先交代「錯字書」的善後安排，她說：「10號至31號，歌迷可以攞本書去我公司蓋一個印後，就可以另外獲贈一本純文字版嘅書。（你check過啲字？）公司搵咗出版社一個好專業嘅人做校對，我好放心。」但Stephy話因工作太忙，故無暇親自檢查。

談及有報道指她會考中文科只得一分，Stephy澄清：「我會考中文科係只得一分，但其他全部合格，共有9分。」她承認當年求學，中文成績不算叻，不過現時反而愛讀書及學中文，望後天努力可彌補不足，她又勉勵會考生說：「會考生唔好咁大壓力，人生唔係得一次考試，唔係睇會考分數。」

患難見真情

至於有報道指Stephy懷疑死敵傅穎（Theresa）放暗箭，Stephy力攬Theresa說：「我信得過佢，我唔信雜誌。」她又說得知Theresa在blog中撐她，是最開心的支持，有謂兩人的關係有改善？Stephy說：「呢啲叫經歷。（患難見真情？）係呀，大家都冇嘢。」

另外，Theresa在其blog上，表示會考中、英文科有C，總分有14分，加入娛樂圈後，發現很愛學習，故決定會持續進修。

採訪：音樂組