一心想在動漫節出「峰」頭的「E Cup乳模」鍾蕙芝（Lavina），早前打鑼打鼓參加動漫節重頭戲Image Girl選舉，但昨日竟突然退選，有指她不滿趙碩之等「同輩」擔任評判，兩大o靚模陣營為此隔空互片，碩之更寸Lavina退選「玩嘢」！
Lavina在書展被搶盡風頭，她一心想借參加動漫節Image Girl選舉挽回聲勢，不過昨日卻離奇退選。其經理人Admond在電話中表示，Lavina有其他合約在身，參選這個比賽會有牴觸故決定退選，Lavina師妹Leanna會代師姐參賽。
下年可以做評判
對於有指Lavina不屑碩之陣營做評判，Admond指評審團是由大會安排，但他就稍有微言說：「我個人睇法係佢哋未必咁適合做評判囉，因為佢哋同Lavina同級甚至差佢幾個級數！」
而Lavina對退選表示可惜，雖然她否認因不滿碩之等人當評判而退選，但卻暗寸她們說：「佢哋係前輩嘛，不過佢哋今年可以做評判，我下年一樣可以有機會。」
「佢哋講嘢唔使聽」
對於Lavina陣營嫌她們不夠Grade做評判，碩之明顯有火，她說：「我要重申大家唔係同Grade，尤其係夢夢，佢係大師姐又係歌手。佢哋（Lavina）公司講嘅嘢唔需要聽，夠唔夠資深唔係佢哋講。根本係佢有合約問題，冇資格參選，唔係我哋冇資格做評判。」問到Lavina那麼遲才退選會否有問題？碩之說：「我哋做評判好耐之前已經公布，如果唔滿意早就應該退出，宣布好晒先出嚟退選，都唔知佢哋玩乜嘢！」碩之的經理人Angus亦力撐碩之跟Lavina唔同Level。
文：專案組