四出吸金‧搵家長笨

當年七小福在學校生活，于師傅就似鬼見愁，未見其人，先見其藤，眾徒老遠見着他便要繞路走，可是多年之後師傅仙遊，從此陰陽相隔，就是想再見一面也不可能，七小福惘然若失，回想昔日情景，才發覺師傅原來並不是那麼可怕。

試想想，當年于師傅辦學沒有政府或財團的資助，他卻抱着愚公精神，要把京劇發揚光大，可是儘管有熱誠有堅持，沒錢還是甚麼也不行。六、七十年代的香港，經濟還沒起飛，錢不易賺，單靠七小福四出表演的酬金還是入不敷支，于師傅只好想盡辦法吸金。

據元彬憶述，于師傅有千百萬個搵錢方法，薑愈老愈辣，人愈老愈狡猾，有時為了吸金，連七小福的長衫幫（有錢一族）也不放過。

元彬說：「師傅好狡猾㗎，因為一套戲服好貴，要成幾千蚊，所以師傅有時會搵啲比較有錢嘅七小福屋企人津貼做戲服，我最記得有次師傅打畀元彪嘅屋企人，話佢做咗一套戲嘅主角，跟住叫佢啲屋企人畀錢做衫，佢屋企人梗係開心啦，仲包咗幾行飛，諗住同啲朋友一齊睇個仔做主角，點知去到睇嚟睇去都睇唔到元彪個樣，後尾先知原來個主角根本係另一個。」

紆尊降貴‧賺錢加餸

于師傅偶然確是耍了狡猾招，不過當走到山窮水盡的時候，堂堂大師也得紆尊降貴，檢菜葉養活這班嘩鬼呢！

元彬從一位教過七小福功夫的呂師傅口中得知，于師傅有過一番不為人道的辛酸：「有時諗番起，師傅真係好偉大，佢為乜要養大我哋啫！其實當年嘅生活真係好艱苦，呂師傅講，嗰時師傅為咗賺錢養家，成日喺油麻地嗰頭孭住個大箕，一路行一路拮起地上面啲菜葉放入個箕度，然後拎去賣，佢次次都由油麻地走到去尖沙咀㗎，嗰時一箕菜葉大概賣到兩毫半子，然後師傅就會將啲錢交畀師母，用嚟加餸畀我哋食。」

于師傅一番苦心終沒白費，多年後七小福沒懷恨藤影縱橫的可怕日子，卻感激師傅給他們無盡的好處。 （三十三）