「宿敵」Stephy和Theresa是非不絕，昨日書展開鑼，兩人冤家路窄竟在同日出書掀惡鬥，更以黑白雙煞look正面交鋒，Stephy穿黑色斜膊裙騷香肩，Theresa則穿自畫白tee騷長腿，還自爆穿回去年UFO走光的打底褲，結果失寵的Theresa因露得較多較性感穩勝第一場。現場所見，兩女各獲400位fans撐場，打成平手，不過Stephy就搶得頭啖湯搞簽書會，fans舉燈牌兼送花嗌足10分鐘，但Theresa的fans則打鑼打鼓，兼叫到拆天，聲勢之浩大力壓Stephy一族。Theresa更自爆：「我知啲籌炒到百幾蚊個。」

Stephy搶飲頭啖湯先舉行簽名會，在場傳媒瘋狂拍照。

Theresa到場時獲場內眾多fans打鑼打鼓兼喪嗌支持，聲勢極之浩大。

即場換書交戲

由於兩女緊接搞簽書會，造就碰頭機會，但合照時卻企到離行離列，明顯Theresa與連輸兩場的Stephy面和心不和，最後要記者三催四請，她們才肯並肩合照。期間，Theresa還指揮Stephy望鏡頭，Stephy則說趁機換書交戲，但全程冇傾偈零交流。

搶得頭啖湯的Stephy說：「好緊張，大家搞到我好似結婚咁，一早醒咗瞓唔着。（同Theresa換書泯恩仇？）冇恩仇，一早準備好，佢唔送我都會買。」至於有雜誌指Theresa書中自爆的愛情騙子是其緋聞男友方力申，Stephy力撐小方說：「Theresa話唔係公司同事，唔好再估。」

Theresa被fans打動突然谷淚。	Paco（左）和陳輝虹齊現身撐Stephy與Theresa的簽名會。	僅靠傅穎書內的文字，實在難以看出誰是「愛情騙案的兇手」。

否認小方騙愛

至於緊接Stephy搞簽書會的Theresa，否認兩人零交流，只推說或許大家心情太緊張，她又否認小方是她書中的愛情騙子：「唔係公司人，我唔會講大話，但亦唔會公開，唔想影響人影響自己。（陳輝虹話係幽靈？）佢好幽默，可能佢唔想牽連公司咁多人，總之我唔係老作做新聞，唔真實冇意思。」由於Stephy今次新書是虛構的愛情小說，記者即追問Theresa是否寫小說便沒意思？她說：「唔係，我講自己啫。」

簽書會結束後，Theresa突然一招眼紅谷淚：「好感動，fans咁支持我，見到fans喊我都喊。」雖然Stephy當時已離場，不過Theresa立即再成為傳媒焦點，可謂連尾彩都攞埋！

採訪：音樂組