前晚模特兒Jocelyn以三點式上陣，為君悅酒店舉行的伯爵活動示範最新Limelight Paradise系列首飾。向來不介意騷身材的她對於近期靚模氾濫，自言從未跟她們合作過，並指大家巿場不同，似乎有意劃清界線：「佢哋做嘅嘢我唔會做，我哋係唔同類型，相信香港有足夠工作畀兩邊。」
對於不少靚模紛紛推出寫真，大有條件出寫真的Jocelyn坦言不會跟風，因為要保持高貴形象。她說：「我形象向來好好，好高貴。（係咪影咗就唔高貴？）唔係。我今日都着比堅尼做騷，但係戴住珠寶就好高貴，唔係嗰回事。（即係佢哋Cheap？）唔係，我冇講過，其實着泳衣都可以好高貴，總之佢哋冇影響我嘅工作。」
Jocelyn又透露早前以七十萬美金在美國置業，問到下一步是否造人時，她笑言要等多四、五年，因為她太熱愛工作。