Joey、軟硬天師的葛民輝、林海峰（阿Jan）及陳奕迅昨日齊以速遞員打扮出席麥當勞活動，一身跌打酒味的Joey，解釋因日前穿着高踭鞋拍攝唱片封套七小時後導致痛楚，惟有捽跌打酒止痛，雖然辛苦，但Joey表明為專業不會放棄穿高踭鞋，反而容媽媽與歌迷比她更緊張，她說：「媽咪好心痛，鎖起個鞋櫃，啲歌迷又叫我唔好着高踭鞋，好似有好多個阿媽咁。」

葛民輝（左起）、陳奕迅、Joey及阿Jan昨日齊以速遞員打扮出席活動，眾人一聚頭即擺鬼馬甫士。

阿Jan（右）爆女兒得知停課消息即異常興奮。

想為青雲送外賣

至於稍後將為麥當勞親身送外賣的Joey說：「未入行前做過暑期工送信，好開心，因為要自己諗一條最快嘅路線，符合我嘅冒險精神。」Joey笑言最想為劉青雲送外賣。另外，Joey又大談一次嚇驚酒店服務員的經歷，她說：「有次喺內地做嘢，room service一嚟，自己就一支箭衝出去，唔記得自己着住睡衣又冇化妝，個服務員見到有一秒停頓，露出驚恐嘅表情！」

阿Jan女兒停課

此外，小學及幼稚園等因豬流感（H1N1甲型流感）影響停課十四日，阿葛就說兒子不屬強制停課的一群，而阿Jan就抵死地以《全英一叮》形容停課消息，笑言女兒似奪金起舞，他又將老婆彭羚比喻為「村姑Susan」：「另外就有個『村姑Susan』好似落敗咁坐咗喺度，諗緊嗰十四日嘅工夫。」至於有指農夫成員C君與阿Jan家姐林珊珊大女撻着，Jan就表示不就個別事件作出評論。

文：音樂組