鄧萃雯在《巾幗梟雄》中演活了敢作敢為的四奶奶，現實中的她在昨晚播出的《志雲飯局》中，亦勇敢承認曾戀上有婦之夫，換來傷心又失望的下場，成為人生唯一後悔的一段情，而當年有傳遭雯女介入婚姻的麥潔文則坦言已原諒對方。
鄧萃雯在《志雲飯局》中暢談與萬梓良、鄭敬基的感情往事，雖然提到戀上有婦之夫時並未開名，但當年江華被傳媒連續六日拍得出入雯女寓所，繼而引發江華聯同妻子麥潔文公開力斥雯女的往事，不難令人有所聯想。
自比「細路仔玩刀」
雯女在節目中解釋當年不是要破壞別人婚姻，只是一心為愛：「戀上有婦之夫時，我知對方有家庭，我冇諗過要破壞人哋婚姻，只係諗住愛，第三者好多時都好傻，會覺得對方唔快樂，自己先係佢嘅right one，拯救緊對方。當時我相信對方都好愛我，我係個可以為愛犧牲嘅人，但到頭來發現件事唔係想像中咁，甚至會變到反目無情，我好hurt、好失望，當我知道件事會影響到第三個人，我仲唔走？我動機都唔係咁，何苦呢？」
雯女被問到是否相信可以做第三者，而不影響別人婚姻時，她後悔地說：「好似細路仔玩刀，未流血未痛，唔覺得係乜嘢；到發現可能會被
甩手指，先知有好多複雜嘢要面對，或者會傷害到人，嗰刻會識停手，呢件事係我唯一嘅後悔。以後都唔會再有同類事件發生，我都係喺破碎家庭成長，呢啲事會影響小朋友，對大家都唔好嘅事就唔應該去做。」
「慶幸冇太怨恨」
當年曾與丈夫聯手力斥雯女的麥潔文坦言已原諒對方：「個個人後生都會做錯，我都有做錯過，但上帝原諒咗我，人哋做錯我都會原諒，我欣賞鄧萃雯好努力去修補同認錯，（有冇嬲過雯女？）當時有嬲，慶幸自己冇太怨恨，冇做到乜嘢難睇、挽救唔到嘅嘢，欣賞雯女努力做好榜樣，時下年輕人道德同操行唔好，佢可以教育下一代。」對於麥潔文的言論，鄧萃雯昨晚回覆謂：「人誰無過，最重要知錯能改，深信真心悔改，會得到基督原諒，基督已經寬恕咗我。」正在內地工作的江華至截稿前仍未回覆。
文：影視組