舞林高手陳偉霆原來是個「儲物狂」，自稱家中收藏大批「無價珍品」；勿看他陽光味十足，卻如普羅港女一樣瘋狂愛上Bling Bling，而最令人估不到的，竟是他當唐老鴨毛公仔是夢伴！
陳偉霆（William）的收藏品有：限量版米高積遜「The Video Singles Box Set」、耳筒機、閃爆的鑽石咪、鑽石錶及煲呔，還有一隻「殘殘哋」的唐老鴨毛公仔，雖然這些「珍藏」並非價值連城，但對他卻意義深遠。
為MJ買錄影機
William表示米高積遜（MJ）「The Video Singles Box Set」是宣傳唱片的工作人員所送，當年他尚是新人時收到該份禮物，令他受寵若驚，他說：「我細細個就鍾意跳舞，MJ係一代舞王，我當然瘋狂愛上佢，記得為咗MJ，特登買部錄影機，方便我逐格重播學佢跳舞。」由於William極愛閃的物品，所以經常把收到的Bling Bling禮物珍而重之。最難忘是有年生日，收到由朋友花幾晚通宵、親手貼上過千粒閃石的「鑽石咪」，至於閃爆煲呔及錶，則是他出騷時用過及贊助商所送。
問到那隻唐老鴨毛公仔，他就說了一個感人故事。William表示當年至錫他的家姐到外國升學，他在機場聲淚俱下死纏對方，家姐惟有送唐老鴨公仔安慰他。結果唐老鴨就成了William的「慰安鴨」，並且見證了一段姊弟情；不過有次他搬家時遺失了該隻公仔，令他失落非常，幸好遊香港迪士尼時，再遇上這隻「似到十足」的唐老鴨。
拍MV勞師動眾
另外，William日前在停車場為新歌《戰士》拍攝MV，內容講述他被大班喪屍追捕，經過連場肉搏，William得勝馴服眾人變身喪屍領袖，他笑說：「公司搵咗成三十幾個特約演員嚟拍，係我拍MV以來最人多勢眾一次。」工作人員不禁笑他「疊馬」，問他可有試過畀人圍？他表示：「我唔鍾意撩事鬥非，唔會同人打交，點會被圍？但圍住睇我跳舞就試過！」
採訪：音樂組