任賢齊日前接受ontv《娛樂on Show》專訪時，自爆作為「好男人」代表的他，少年時以Rock友爛牛仔褲打扮「見家長」，因而嚇窒女友爸爸，非常搞笑！
小齊96年以一首《心太軟》風靡亞洲，「好男人」形象深入民心。為了新碟《齊待》，小齊近月走遍大江南北，開展一連串宣傳活動，日前他接受ontv的《娛樂on Show》專訪時，更與兩位主持人陳振安及俞詠文真情對話。
開齋收錄廣東歌
來港發展13年的小齊，其半鹹淡廣東話已成為其「商標」，不過他卻遲遲不敢錄廣東歌，經唱片公司和歌迷多年游說，他終在新碟收錄兩首廣東歌《別戀我》和《朋友你變了沒有》，小齊自爆《別》歌錄了三天，打破其錄歌最長時間紀錄。除了唱歌，小齊又在其電影中挑選心水至愛角色，他說：「最愛當然係《星願》裏洋葱頭啦！第一次擔正男主角，而且劇本感人，每次翻睇都眼濕濕。」
十年人事大轉變
這十年間小齊無論外形和性格都有很大轉變，最開心是愈變愈好。除了演技和成就不斷進步，小齊亦由吊兒郎當變成有妻有女的堂堂男子漢。小齊笑說：「我以前覺得『爛撻撻』好型仔，所以當初仲披頭散髮見女友爸爸，嚇到佢（女方爸爸）好擔心，全程食飯不停嘆氣同搖頭。其實，如果將來我個女帶個咁嘅男友返屋企，我肯定激死。」
問他可會接受囡囡將來與男友同居不結婚？小齊即大叫：「報應囉！我梗係會唔開心，所以將心比己，好明白Tina（女友）爸爸嘅心情。我哋係會結婚，不過公眾人物婚禮嘅規模大小會被拿作比較，我需要從長計議，畀啲時間我！」
文：專案組 攝：黎志輝