諸葛梓岐早前的「公主言論」遭網友批評，日前她一於少理是非，穿上短褲騷長腿殺落銅鑼灣，更在眼鏡店內「照爆鏡」，獲猛男店員熱情招呼！
最近新一代模界鬧出不少是非，其中曾自爆月花十萬元零用錢的諸葛梓岐，被網友批評她有「公主病」。不過梓岐一於懶理是非，日前更心情勁靚到銅鑼灣Shopping，期間走到尊貴視力眼鏡店，樣子甜美的她，加上一條性感熱褲，冧爆男店員，獲對方熱情招呼，公主出巡果然零舍不同。
左照右照極貪靚
梓岐早前承認與Neway太子爺薛嘉麟拍拖，當日未見其男友在場，穿上三吋高跟鞋的她步履輕盈地橫過馬路，她甫步入眼鏡店，即極速行了一圈睇心水款式，然後不斷將眼鏡試戴，在鏡前左照右照，認真貪靚。
隨後有一名猛男店員主動上前介紹，又招呼她坐低慢慢揀，只見一大盤眼鏡放上枱，而她似乎對長方形眼鏡特別情有獨鍾，更叫店員為她驗眼，然後畀錢埋單。
戴大眼仔見疲勞
梓岐事後在電話中表示一向有戴大眼仔，但有時難免令眼部疲勞，問她是否戴眼鏡擋桃花？她說：「哈哈，唔係，我最近發現自己近視加深，睇嘢有少少唔清楚，所以咪買囉，（唔戴大眼仔？）都有戴，不過因為之前同呢間舖頭行過騷，佢畀咗一個好好嘅折頭我，真係開心。」
文、攝：專案組