古巨基（基仔）演唱會昨日開鑼，為配合「Eye Fever」主題，基仔的舞衣大玩視覺效果，「螢」爆登場，為了開幕時從天而降，他提早爬到紅館的天花板位置，睇住觀眾入場，嚇得他腳仔軟！
一連六場的《古巨基eYE FEVEr演唱會》昨晚假紅館開鑼，全場爆滿，基仔好友周慧敏、Angelababy、谷祖琳、艾粒的Donald及女友Jan等齊齊捧場，Laughing哥謝天華則擔任特別嘉賓。
第三隻眼睇「3D」
為配合「Eye Fever」主題，入場觀眾獲派一副立體眼鏡，開騷時基仔站在巨型mirror ball從天而降，身穿銀色珠片西裝的基仔，右膊孭住迷你版閃閃波，唱出歌曲《錢錢錢錢》，他說：「我從未試過去到整燈嗰個位咁高，真係有啲驚，我預早爬上去，睇住你哋入場，真係腳都軟。」
基仔化身古sir介紹「3D」時不忘加送爛gag：「今次個演唱會同個三字好有緣，係我第三次個人演唱會，又係我第一次開三面台，今次準備好多嘢畀大家睇，兩隻眼都睇唔晒，我好誠意邀請大家用埋第三隻眼，我指係腳眼，哈哈，係咪好爛呢？」及後，基仔換上螢光黃色系的箭豬造型，大玩視覺效果，跟幾位結他手jam歌，令人聽出耳油。
Paco基仔咬耳仔
而昨午五時許，黑超基仔身穿大會T恤及cap帽，跟經理人黃栢高（Paco）、雷頌德及Sunny Wong等人齊集紅館後台拜神，近日有傳因續約問題而鬧不和的Paco及基仔不時咬耳仔，正好粉碎不和傳聞。 文：音樂組