早前有報道「老屈」何鴻燊女兒何超雲與何厚鏵姪兒何敬豐拍拖，不過事後何敬豐親向本報發聲明澄清絕無此事，更指超雲唔算靚。一向疼錫女兒的賭王前晚出席活動時「回敬」何敬豐，直指他跟超雲不合襯，還鬼馬地說：「佢到我膊頭咋！」
早前有報道指何厚鏵姪兒何敬豐與賭王千金何超雲拍拖，事後何敬豐親向本報發聲明澄清，表示與超雲絕對沒有發展的可能，他更指：「佢（超雲）係靚女，但對我嚟講唔係好靚。」而賭王跟三太陳婉珍亦於前晚對事件作出回應。
學問最緊要
二人出席直升機啟動儀式，三太率先為女兒的「戀聞」平反，說：「我話佢哋係朋友你哋又唔信！」對於何敬豐指超雲「唔係好靚」，一向疼錫超雲的賭王即回敬他說：「講句問心！佢哋襯唔襯？佢（何敬豐）到我膊頭咋！（有錢咪得囉！）唔得，學問最緊要。」
有九架飛機
賭王其後透露他擁有九架飛機，但卻不會送飛機給太太。他說：「因為佢哋鍾意坐船，（咁會唔會送畀仔女？）唔會，飛機點送！」下月為三太一對龍鳳胎猷啟及超蓮的十八歲生日，賭王表示二人當時會在英國準備考試，故會延遲慶祝。
此外，同場的嘉賓還有快為人父的林祖輝和張王幼倫。張王幼倫透露九月將舉行一大型慈善活動，並邀請李雲迪合作。她又形容自己是開通父母，不反對讀大學的女兒拍拖。
文：名人組