本文重點
人氣組合Soler昨日為新碟宣傳，殺入旺角舉行街頭活動，fans層面遍布中外及老中青。拒唱兒歌的Soler，更信心十足地說其歌曲能助小孩成長，乘機賣廣告吸納年幼fans。
bma旗下孖仔組合Soler昨日現身旺角為新碟《CANTO》宣傳，相隔四年再次舉行街頭騷，吸引近二百名fans與途人圍觀。
年長fans越洋支持
現場除了有小女孩隨歌共唱外，又有外籍忠心女fans，將刊登於本報的Soler廣告改裝成圍裙現身支持，場面熱鬧。Soler大騷歌藝之餘，又變身售貨員親自賣碟，近距離冧爆fans。
問Soler會否考慮唱兒歌吸納更多小朋友fans時，哥哥Julio斷言不信兒歌有助孩童發展：「Soler嘅歌拍子簡單，聽我哋歌大，就可以幫助才華發展變聰明。（公司要求都唔唱？）冇需要，鍾意我哋歌嘅小朋友都比較成熟。」現場所見，女fans佔大半數，Soler對此謙稱只因香港人口比例女性較多。
Soler又自爆早前到台灣出騷時，獲一班「年輕長者」撐場。Julio說：「有班公公婆婆嚟支持，有個七十幾歲嘅公公仲攞住拐杖，話特登嚟睇我哋，初初都唔係好信，問佢係咪咁啱經過，佢即刻好激動話係香港飛過嚟！」
忘記歌詞蝦碌甩嘴
此外，細佬Dino唱《風的季節》中段時蝦碌甩嘴，他透露已非第一次忘詞，他說：「真係解釋唔到，出騷前綵排唱過冇問題，但唔知點解成日唱到嗰度就空白咗。」
文：音樂組