賭王何鴻燊繼日前與三太陳婉珍於珍寶海鮮舫慶祝結婚31周年後，前晚便輪到陪四太梁安琪往中環蘭桂坊酒店食飯慶祝復活節，同行還有四太一對孖生兒子猷亨和猷君以及數名親友，而近來忙於拍拖的何超盈則未見影。
眾人於晚上十時許離開，一臉疲態的賭王與四太手拖手步出，問到近日有指超雲與何厚鏵姪兒何敬豐拍拖一事，向來有問必答的賭王及四太均沒有反應，隨即登車離開。
昨日記者致電四太，問到當晚是否慶祝復活節？她說：「普通食飯，唔係咩慶祝。（三太結婚31周年，你又幾多周年？）我喺舞台長大，唔使搞埋啲咁嘅嘢。（何敬豐否認與超雲拍拖喎！）唔係就唔係囉！（超雲冇同你提過？）佢要講就講，佢同何家都熟。（有冇同何生講？）點得閒同佢講埋啲咁嘅嘢！」然後匆匆掛線。