有份為即將上映的動畫3D電影《天煞撞正怪怪獸》配音的基夫修打蘭，日前與夢工場CEO謝菲卡辛堡來港宣傳，並接受本報訪問。雖然還未看真香港，但基夫已揚言想到港取景拍電影版《24》！
最近忙於為《天》片宣傳的基夫，日前出席完洛杉磯首映禮後，便立即來港繼續宣傳。一臉倦容的他更直言對香港未有感覺：「我到埗咗五、六小時咋，不過都覺得係個好靚好特別嘅城市，已經帶定相機影相。」
配音好玩
基夫所配音的猛哥將軍，其樣貌巧與他有幾分相似，他立即耍手擰頭否認，他又指：「我以往配音成日都被要求用番自己把聲，今次可以特別做把聲配覺得好好玩。」
他透露配音期間撞正拍人氣劇集《24》的檔期：「周一至五拍劇，仲一日拍十四個鐘，所以星期六、日配音正好畀我笑番吓！」他揚言至愛同鄉曉羅利所配的大強博士：「好多人淨係睇美國劇集《醫神》認識阿曉，其實佢配音把聲令我諗起佢套英國喜劇《黑爵士》系列。」
動畫有市
《24》至今已拍到第7季，他大讚第7季是最好一輯，又表示未對角色厭倦：「我好興奮五月將拍第8季，電影版就等到劇集完咗先開拍。」雖然電影版未落實地方取景，但他指：「我依家坐緊呢度，覺得喺香港拍都幾好！」當被問及去年因醉駕入獄時，他即不耐煩地說：「之前幾個訪問已講夠，真係唔想再講！」
至於夢工場CEO謝菲受訪時大讚《天》片配音演員都十分獨特，亦指大多的動畫片都可湊成夢幻配音人選，自覺非常幸運。他更大讚負責其公司另一動畫系列《史力加》的香港動畫師許誠毅是「超級巨星」：「佢係世上其中一個最好嘅動畫師，夠特別，作品好出色！」他亦提到創作組為籌備《功夫熊貓》續集，於去年十一月曾到訪中國，並親自到成都「會見」真熊貓。被問到製作有否受經濟不景影響，他笑指：「就係經濟唔好，觀眾先需要睇我哋啲動畫笑吓，逃避一下現實，經濟愈差，動畫片反而愈成功！」
文：外娛組