本文重點
三年沒有開演唱會的at17，今個月開騷又撞正金融海嘯，不過她們一於懶得理，實行豁出去；二汶和Ellen今次會大玩親民，走落台企在觀眾面前唱歌，二汶笑說，如果遇到鹹豬手就會以電棍對付。
at17將於本月24及25日假伊館舉行《at17 Colours Live 2009》演唱會，主題是back to basic，一個絕對的band show，唔賣噱頭，唔再着蜘蛛衫，但會落台企喺觀眾面前唱歌，二汶和Ellen不約而同地說：「我哋啲fans好怕醜，唔會惹起混亂，呢part特別獻畀觀眾。」點保護自己？二汶笑說：「喺支咪尾綁電棍，一有事就電，哈哈。」Ellen笑說：「保護自己要識say no。」
10個鐘影海報
今次at17再搵恩師黃耀明做監製，二汶說：「明哥捉我哋開咗幾次會，用６個鐘度rundown，佢成腦idea。（要求高？）06年後，明哥已經放手畀我哋自己做，以前佢好擔心，依家就放心。」
入行８年的at17，對自己愈來愈有要求：「影海報都用咗10個鐘，愈大愈學會有要求，呢個騷係我哋嘅，正如新碟主碟曲《快樂很我們》，06年我哋都『海嘯』過，試過跌低，差唔多３年冇搞live show同冇出碟，得個等字，明白快樂唔係一個純粹天真面對嘅態度，經過挫折學會長大，依家大個女，希望畀大家啟發，算係身體力行鼓勵。」
擔唔擔心金融海嘯影響票房？at17輕鬆說：「唔理，豁出去，當經濟最差，娛樂就會最好，呢個係心靈滋潤，與其買股票，不如買飛睇演唱會。」
採訪：音樂組
髮型：Eve@P.O.P. Hairdressing
服裝：Initial