陳豪昨日出席OSIM記者會，透露他的母親是中醫，自己都是三分一個「陳醫師」，曾經替人做中醫指壓，但緋聞女友廖碧兒（Bernice）卻未曾受惠，期間，他被陳志雲踢爆與Bernice「打孖上」出席活動酬勞好貴，令他一臉尷尬。
陳豪、陳志雲、楊思琦、李香琴昨日於奧海城出席OSIM uDream 記者會，期間他們逐一試坐按摩椅，問陳豪有沒有女朋友替他按摩時，他謂：「冇呀！自己唔係好受，我媽咪係中醫，由細到大畀佢指壓，佢嘅指壓按摩對我嚟講係『痛楚』兩個字，不過依家應該到我買番張按摩椅畀佢。」
情侶檔收貴好多
陳豪又自稱是三分一個「陳醫師」，對中醫有些了解，問他有否替女友指壓，他謂：「都冇喎！但我試過同人中醫指壓，瞓歪頸幾有效，冇七成都有八成。（廖碧兒有冇試過？）冇！」期間，行過的陳志雲踢爆謂：「Bernice同佢一齊出function貴好多㗎！」陳豪尷尬說：「佢成日唔喺香港，我不嬲又平又抵用，佢又係又平又抵用，呢啲嘢可以多用啲。」
思琦表示平日常穿高踭鞋，故家中都有腳部按摩機，但都想買一部按摩椅給母親，問她會否買給男友母親？她笑言：「咁要睇吓有冇折扣先。」
最近亞視引入「中天亞洲台」，更找來楊千嬅、陳奕迅等與無綫有合約的歌手拍宣傳片，問陳志雲無綫會否有行動禁止？他說：「外地頻道落地香港未必係管轄範圍，都要睇番個別合約同合作關係。」問中天亞洲台對無綫收視會否有影響，他謂：「冇乜大影響，有多啲選擇係好事。」
千嬅日本開眼界
此外，楊千嬅為化妝品牌擔任美白形象大使，早前更到日本拍宣傳片，千嬅除參觀人形工藝館外，更首次看日本藝伎表演，大開眼界。欣賞梅花時，千嬅又謂：「某年生日，朋友趁我唔喺香港，將派對地點用紅玫瑰布置，呢個係好開心嘅回憶。」
文：影視組