惡疾有轉機 順伯盼續獲援手

抗癌路上，順伯一直硬撐，可惜雙腳自病發後逐漸不受使喚，屋內屋外走動全靠妻子攙扶，或以輪椅代步，「都係靠老婆推住輪椅先可以落樓抖下氣。」有時順伯不忍妻子操勞，嘗試以一己之力於屋內「移動」，卻往往弄至焦頭爛額，「試過半夜起身想去廁所，見老婆瞓得咁舒服費事嗌佢幫手，點知就跌親，成身傷晒，捽咗成個月藥酒。」順伯前後跌倒三次，順嫂一臉憐惜地拉着丈夫的手說：「跌到又瘀又青，再有咩事都唔知點照顧佢！」

與病妻互相扶持

順伯曾經被病魔折磨得不似人形，坦言一度嗅到死亡氣息，「電療之後眼耳口鼻都有不明液體慢慢流出嚟，又痛又冇晒力，覺得『係時候喇』。」眼見身體情況日益變差，順伯將所有強積金與積蓄提取並轉交妻子，心底裏則作了最壞打算，順嫂憶起當時情景亦猶有餘悸，「佢好似交代身後事咁，畀佢嚇死！冇咗佢喺身邊我好多嘢都搞唔掂。」

面對難關，順嫂願同度患難，縱使腦血管出現問題數十年，仍包辦家頭細務，「做咗幾十年伴，梗係要互相支持，老公照顧咗我咁多年，係時候到我照顧番佢，我相信只要練習多啲、唔好放棄，佢遲早會好番晒，行得番。」

藥費每次兩萬元

妻子成為順伯「撐下去」的推動力，治療進展良好加上內地女兒近日獲批單程證來港，一家人多了照應，「佢有時瞓醒連床都落唔到，但我一個人又抱唔到佢，依家多個人多雙手。」厚重烏雲中終透出一絲曙光，相信只要籌得善款繼續療程，以順伯一家的頑強意志定能戰勝癌魔。

威爾斯親王醫院發言人證實，病人患有惡性脾淋巴瘤，醫生建議接受利妥昔單抗（Rituximab）治療。由於此藥物屬自費類別，病人每次需用六百毫克利妥昔單抗，每次費用約為二萬元。發言人指病人對此藥的臨床反應良好，醫生或會考慮繼續每三個月使用同等劑量的利妥昔單抗，為期兩年。

捐款編號:12365

記者：朱廣華