惡疾福伯 忍痛照顧肌萎妻

梁福小心翼翼地攙扶妻子何金月坐上輪椅,「佢(妻子)想行步路都難,食飯沖涼去廁所都要人幫手。依家我自己都顧唔掂自己,都唔知點照顧佢……」梁福近日證實患上罕有的晚期惡性間皮瘤,終日痛不可耐,因無力支付約十一萬元自費藥物而向東方日報慈善基金求助,以期早日康復、繼續與妻子奮力迎戰病魔。

梁福現年六十七歲,與妻子結婚接近半個世紀,一直相依為命共渡難關。可惜天意弄人,妻子兩年前患上肌肉萎縮症,出入均需丈夫協助。

患惡性間皮瘤靠嗎啡止痛

今年五月梁福因渾身疼痛而發現患上惡性間皮瘤,終日痛不可耐,甚至要以嗎啡止痛。「一日痛足廿四小時,痛起嚟真係只可以攤喺張床度,要飲嗎啡水先瞓到!」梁福病發前與妻子同住公屋單位,每天肩負照顧妻子的起居飲食,自從證實患上惡疾後,便需與女兒同住,「個女好好,特登辭咗份工照顧我哋,但佢都有自己嘅家庭,好難負擔埋我哋啲藥費。」

對於要照顧年邁父母,梁少芬無怨無悔,但談及自費藥物,則一臉無奈,「我哋幾兄弟姊妹收入都係啱啱夠用,平日根本冇積蓄。我可以辭工照顧佢哋,但就真係負擔唔到咁貴嘅藥費!」少芬坦言每當目睹老父「痛到縮埋一舊」即心痛不已,希望善長能慷慨施援,協助老父尋求一線生機。

屯門醫院發言人證實病人患上晚期惡性間皮瘤,屬一種不常見的惡性胸膜疾病。經評估後,病人需接受抗癌藥物培美曲塞及順鉑混合治療。臨床結果顯示相關藥物治療成效顯著。有關治療每三星期為一個治療周期,病人共需接受六個療程,每周期的藥費為港幣一萬八千元,整個療程合需款十萬八千元。

捐款編號:12296

記者:楊育輝

第一手消息請下載on.cc東方互動iPhone/iPad/Android/Windows Phone Apps