「威威司令好得意呀！」「我鍾意（熊貓）樂樂同盈盈！」為數約二十名學童多是首次踏足海洋公園，對園內各項設施及遊戲均大表好奇，眾人更爭相擁抱專程在門外迎迓的「威威司令」，興奮之情表露無遺。

現年十三歲的小六生馬鐵戈去年才由內地來港，對香港不少事物仍感陌生，「人哋話海洋公園好好玩，估唔到真係可以嚟玩，好似願望成真咁，好想兩個家姐同爸爸都可以一齊嚟玩！」

鐵戈的父母收入微薄，難以支付一家五口逾千元的入場費開銷，令海洋公園之旅一直未能成行。對於是次能夢想成真，鐵戈與母親亦表現興奮，戈母更對能獲邀參加是次新春遊深表感激，「我哋影咗好多相，諗住畀屋企人一齊睇！」

海洋列車「好多嘢睇」

至於活潑好動的顧夢璐則對海洋列車最感興趣，「個車頂好多嘢睇，好得意！」為爭取時間，夢璐甫下車便四出找尋下一個遊玩目標，一直陪伴在側的母親亦樂上半天，「過海要好多錢，好多時我哋都留喺屋企附近行吓就算，今次咁難得去到咁遠嘅地方玩，我同囡囡都好開心！」即使體力不及女兒，顧太亦緊緊跟隨其後，以便照顧。

海洋公園助理公共事務經理譚潔兒表示，為貫徹關愛社群的精神，特別與東方日報慈善基金合作，以優惠門票及膳食招待基層家庭到公園遊樂，「好高興可以畀佢哋入嚟親近大自然，仲可以體驗社區關懷！」

記者：梁少儀

攝影：鍾麗珊