有冇聽過一種叫「海中黃金」嘅美食？之唔係台灣名物烏魚子囉！而且呢種美食據講仲係男士補身佳品添，你有興趣試試嗎？
烏魚子係由雌性烏魚嘅魚卵做成，又叫「烏金」，外表橙橙黃黃，雖然係台灣名物，但其實日本、意大利、西班牙同內地都有出產。《本草綱目》對烏魚有以下記載：「生東海，狀如青魚，長者尺餘，其子滿腹，有黃脂、味美，獺喜食之，吳越人以為佳品，醃做鮝脂。」所謂鮝脂，即製乾咗嘅烏魚子，可見呢種美食喺古時已經有。
烏魚子係一種營養豐富嘅美食，含蛋白質、多種維他命、多種人體必需嘅氨基酸，以及銅、鐵、鋅等成分。中醫更認為，烏魚子具有養血、補脾、益腎、滋陰、止帶等功效，而且有助預防脫髮，你話係咪男士嘅補身佳品先？
炮製烏魚子，煎、炸或水煮都可以，但有一點要注意，呢種美食嘅膽固醇同鹽分偏高，患有心血管病嘅人士唔係太啱食。另外，烏魚子嘅蠟質亦非常高，唔易被消化同吸收，所以有得食都要適可而止。